Actualités

EPP Ambohibao Antehiroka Nahazo efitrano famakiam-boky vaovao

Actualités
Alarobia 03 Febroary 2016

Nahazo efitrano famakiam-boky vaovao ny sekoly ambaratonga fototra etsy Ambohibao Antehiroka, kaominina Antehiroka.

Omaly no notokanana tamim-pomba ofisialy ny fotodrafitrasa vokatry ny ezaky ny sekoly sy ny ray aman-drenin’ny mpianatra ary ny mpiara-miombon’antoka. Tonga nitokana izany i Voahangy Rajaonarimampianina, vadin’ny filoha izay nanolotra karazana boky amin’ny fiteny malagasy sy frantsay ary anglisy niampy fahitalavitra iray sy lecteur DVD ary solosaina feno sy seza, latabatra ary etazera. Tsy adinony ihany koa nandritra izany ny nanolotra fanampiana ho an’ny cantine ao amin’ity sekoly ambaratonga fototra iray ity entina hanampiana ny mpianatra. Betsaka amin’ireo ankizy mantsy no tsy mihinana ara-dalàna intsony any an-tokantranony noho ny fahasahiranan’ny ray aman-dreniny. Anisan’ireny ny fotsimbary 15 gony, siramamy roa gony, voamaina roa gony, menaka roa bidons, savony folo baoritra, koba aina folo fosonosana ary vatomamy sy bisikoitra sy ronono. Tsy adinony ihany koa nandritra izany ny nanolotra tafo miisa 96 entina hanatsarana ireo efa simba ho fanohanana ny sekoly amin’izao fotoam-pahavaratra izao.

Pati