Actualités

Partagé sur :
• facebook

Eto an-drenivohitra avokoa ireo Ben’ny tanàna avy amin’ny faritra eran’ny Nosy. Nakarina hamonjy ilay kongresin’ny lalana sy ny fitaterana andiany faha-5 tanterahina eny amin’ny foibe fandraisana fivoriana iraisam-pirenena na CCI Ivato, izay hanomboka anio izy ireo

Tsapan’ny mpitondra ankehitriny ny maha zava-dehibe ny lalana, nefa dia nanenjehana mafy an’i Marc Ravalomanana raha nanao ho laharam-pahamehana ny fanamboaran-dalana izy, fony teo amin’ny fitondrana. Nataon’ny mpanohitra ny fitondrany litania, ary zary teny fanafokafokana mihitsy aza tamin’izany ny hoe : «ny lalana angaha azo hanina !». Izao anefa, efa tao anatin’ny tapabolana izay no natao totoafo ny dokambarotra fampahafantarana ity kongresy ity ary nosafidiana ho lohahevitra mihitsy aza moa ny hoe : «Ny lalana sy ny fitaterana, fitaovana mahomby entina miady amin’ny fahantrana». Dia io fa hifandroritana ireo Ben’ny tanàna. Ankilany ny mpikarakara mivantana ny hetsika, izay kandida tsy lany tamin’ny fifidianana filoham-pirenena farany teo, mety efa manomana ny amin’ny 2018 dia maka ny fon’ireto Ben’ny tanàna ireto amin’ny hoe tsy voatery hiandry famatsiam-bola avy any ivelany isika amin’ny fanamboaran-dalana ; andaniny anefa dia tsy hipetra-potsiny ny antoko eo amin’ny fitondrana, manararaotra ny hamaroan’ireto Ben’ny tanàna ireto hanasana atidoha, f’izay tsy miaraka amin’ny fitondrana dia tsy ho vita eo ny lalany ; ho avy rahateo ny fifidianana Ben’ny tanàna. Mialoha an’io ny kongresin’ny antokon’ny fitondrana hatao amin’ny tapaky ny volana desambra ho avy io.

Tia Tanindrazana

Samia mijoro ho an'i Gasikara.