Actualités

Antandrokomby-Anosizato Andrefana Niditra an-tsekoly ny omby

Actualités
Sabotsy 22 Oktobra 2016

Niditra an-tsekoly ny omby omaly maraina teny Anosizato Andrefana.

Omby iray izay saika hovonoina teny an-toerana no tafaporitsaka teo am-pamotorana azy ka niditra avy hatrany tao an-tokotanin’ny sekoly ambaratonga fototra Antandrokomby Anosizato Andrefana ihany. Nifanehitra indrindra tamin’ny fotoana nakan’ireo mpianatra rivotra anefa izany ka nisavoritaka samy nanavotra ny ainy ny rehetra. Ny fokonolona sy ny tompon’omby teo an-daniny niezaka ny nifanome tanana ihany koa ka ilay tady teny amin’ny tandrok’ilay omby no nezahina nampidarabohana ity biby ity izay avy any Mahasolo Tsiroanomandidy no nakana azy. Tsy mbola nijanona ihany anefa ilay omby ka voatery notapahina mihitsy ny tongony ilany. Na izany aza tsy nisy ny naratra na ny aina nafoy. Ny hany nanaovan’ny talen-tsekoly ao an-toerana Randrianjafy Ellidio antso avo sy fanentanana dia ny mba tokony hamefena manontolo ity sekoly EPP iray ity hiarovana ny ain’ny mpianatra amin’ny voina tampoka tahaka izao.