Sosialy

Zokiolona Malagasy Betsaka ireo mbola misedra olana

Sosialy
Talata 02 Oktobra 2018

Betsaka ireo zokiolona mbola misedra olana eto amin’ny firenena, indrindra ireo tsy manan-janaka. Saika tsy manana mpikarakara avokoa mantsy izy ireny amin’ny androm-pahanterany, hany ka betsaka ireo mivelona amin’ny asa fangatahana eny amoron-dalana.

Izany no antom-pisian’ny fikambanana Foyer de vie eny Ampasanimalo Antanimora, hoy ny dokotera Nicolas Rakotondrasoa, tompon’andraikitra voalohany ao an-toerana. Mandray an-tanana feno ireny zokiolona tsy manam-piahy ireny izy ireo na manam-piahy ihany saingy tsy zakan’ny zanany. Manomboka amin’ny sakafo sy ny fitafiana, ny fitsaboana raha tojo tsy fahasalamana, eny hatramin’ny fandevenana. Miisa 64 ankehitriny ireo zokiolona karakarain’izy ireo. Efa 29 taona no nisiany. 97 taona no zokiny indrindra, renim-pianakaviana avy any ambanivohitra lavitra izay nilaza fa tena tamana tsara tokoa sady voakarakara. Mila manampy ireny zokiolona ireny ihany ny fitondram-panjakana. Manodidina ny 6 % izy ireo manerana ny Nosy ka mendrika ny hojerena sy hokarakaraina. Nomarihina omaly ny andro maneran-tany ho an’ny zokiolona. Fizarana vary, menaka, savony no nanamarihan’ny minisiteran’ny mponina azy nanomboka ny zoma lasa teo ka zokiolona 60.000 isa no ezahina hahazo tombontsoa manerana ny Nosy. Teny Antanikatsaka Itaosy no nankalazana izany tamim-pomba ofisialy ho antsika teto amin’ny Faritra Analamanga.

Pati