Sosialy

Zokiolona eny Ivato Nampanatonina ny fandraisana « pension »

Sosialy
Alakamisy 30 Aogositra 2018

Ho afa-pahasahiranana ireo zokiolona mpandray vola fisotroan-dronono eny Ivato.

Vita hatreo ny fiaingana vao mangiran-dratsy miala tanàna mamonjy filaharana eny Ambohidratrimo misy ny birao handraisana valin-kasasarana, izay toerana feno kirihitr'ala sy mangina be. Ny lalana mankany amin’ilay toerana koa malama sady kisilasila ary lavitra satria tsy maintsy mandeha an-tongotra raha miala eo an-tampon-tanànan'ny Distrika. Ny Ben'ny tanànan'Ivato, Penjy Randrianarisoa mihitsy moa no nangataka nivantana tamin'ny filoham-pirenena Hery Rajaonarimampianina, raha tonga nitokana zava-bita teny an-toerana izy ny zoma 24 aogositra lasa teo, ny amin'ny tokony hametrahana toerana hizarana fisotroan-dronono ho an'ny zokiolona ao Ivato, dia izao nivaly izao. Tao amin'ny trano diamondra misy ny Mining Business Center no tokony hametrahana ilay Ivontoerana hizarana fisotroan-drononon'ireo raiamandreny nahavita be teo amin'ny asa ho an'ny firenena fa nafindra ao amin’ny Kartie 6 ao Ivato ihany ary hotokanana anio alakamisy 30 aogositra. Hisinda hatreo izany ny ahiahin’ireo zokiolona amin’ny tsy fandriampahalemana satria misy voaendaka ny sasany na misy misompatra rehefa avy mandray “pension” teny Ambohidratrimo. Tsy mbola nisokatra akory moa ny ivontoerana dia efa zokiolona 200 sahady no efa nisoratra anarana fa handray ny tambin-kasasarany eny Ivato.

Jean D.