Sosialy

Zaza Malagasy Ankizy 4 amin’ny 10 no miasa alohan’ny faha-18 taonany

Sosialy
Talata 30 Jona 2020

Ankizy miisa 4 amin’ny 10 no miasa alohan’ny faha-18 taonany eto amintsika.

Ny 11 % amin’izy ireny no efa niharan’ny herisetra ara-batana nataon’ny mpampiasa azy raha ankizy 9 amin’ny 10 kosa no hiharan’ny herisetra hataon’ny fianakaviany aminy. Ankizy 1 amin’ny 2 ihany koa no fantatra fa lasibatry ny herisetra any an-tsekoly. Mikasika ireo ankizy efa miasa manokana dia fantatra fa maro amin’izy ireny no hirahin’ny Ray aman-dReniny hitady vola ka tsy mahazo mody raha tsy mandray anjara amin’ny fampandehanana ny fiainana ao an-tokantrano. Anisan’ny tena miaina izany ireo ankizy mpatory an-dalambe izay efa mahatratra 2.000 isa ankehitriny, raha araka ny fanadihadiana nataon’ny fikambanana miaro ny zon’ny ankizy iray eto amintsika. Vokany, ny 45 %-n’ny ankizy madinika sisa no afaka miatrika ny fanadinana CEPE noho izany fahantrana lalina hiainan’ny tokantrano Malagasy izay. Ny 23 % no mba afaka manala ny fanadinam-panjakana BEPC raha 2 % sisa no tonga eny amin’ny oniversite. Ahiana hitombo ireo salan’isa ireo, indrindra hatramin’ny niparitahan’ny tsimok’aretina COVID 19 teto amintsika. Saika variana mitady vola avokoa mantsy ny ankizy satria tsy mianatra, raha mankasitraka izany koa ny Ray aman-dReny sasany noho ny fahasahiranana. Antso avo araka izany no hatao amin’ny Fitondram-panjakana mba hijery akaiky izany tranga hiainan’ny zaza Malagasy izany.

Pati