Sosialy

Votsotra tampoka ilay alika Olona enina voakaikitra

Sosialy
Talata 28 Janoary 2020

Olona miisa 6 no indray nahita faisana tamin’ny kaikitry ny alika tany amin’ny distrikan’i Midongy Atsimo ny faran’ny herinandro teo.

Alika masiaka votsotra tampoka izy io raha ny vaovao azo ka nandripaka ireo izay sendra azy. Namonjy toeram-pitsaboana avy hatrany moa ny 4 tamin’ireo voakaikitr’ity alika ireo, raha tsy hita kosa ireo olona 2 ambiny. Nisy ihany koa ireo nametraka fitarainana. Nalefa ao Vangaindrano moa ireo olona 4 ireo hizahana ifotony ny fahasalamany sy hanamarihana raha romotra ilay alika nanaikitra azy ireo na tsia. Tetsy an-kilan’izay, nifanenjehan’ny mponina ary novonoin’izy ireo ho faty avy hatrany ity alika ity. Nivory kosa ny tompon’andraikitra tany an-toerana taorian’izay ary tapaka fa tsy maintsy fatoran’ny tompony avokoa ny alika rehetra manan-tompo ao amin’ity distrika ity manomboka izao, ary hosamborina kosa ireo alika mpirenireny tsy fanta-piaviana. Tsy misy ahiana moa ny ain’ireo olona efatra lasibatra hatramin’ny fotoana nanoratanay, omaly.

Nangonin’i Pati