Sosialy

Vono olona teny Behenjy Hotsaraina rahampitso ilay lehilahy namono ny vadiny

Sosialy
Alarobia 30 Oktobra 2019

Rahampitso alakamisy31 oktobra no hotsaraina ilay lehilahy namono am-pitaka ny vadiny tany Behenjy, herintaona lasa izay.

Efa nampidirina am-ponja vonjimaika izy tao anatin’izay fotoana lavalava izay. Ho fantatra amin’io ny sazy hiandry azy ao amin’ny biraon’ny fitsarana ao Ambatolampy. Mpiasan’ny fitsarana avy aty Antananarivo Renivohitra no hidina any an-toerana handray an-tanana ny raharaha. Raha tsiahivina, niaiky ny heloka vitany ity lehilahy ity, rehefa namitaka ny vadiny ka nilaza taminy fa hitsangantsangana any Behenjy izy ireo. Rehefa tonga tany an-toerana anefa dia nivadihany ilay vadiny ary novelesiny ny maritoa ny lohany ka niafara tamin’ny fahafatesan’ity farany. Ilay lehilahy ihany avy eo no mody nampandre ny fianakavian’ny vadiny saingy efa mailo iretsy farany, noho ny fisian’ny fitarainana nataon’ilay vehivavy hatramin’izay. Nitondra zandary avy hatrany izy ireo. Nandritra ny fizahana ny razana nataon’ireo dokotera sy zandary ihany dia niaiky ny heloka vitany ilay lehilahy. Andrasana izay mety ho tohin’ny raharaha.

Nangonin’i Pati