Sosialy

Volobe na bambou Karazan-kazo hahafahana miady amin’ny fandripahana ala

Sosialy
Alarobia 19 Septambra 2018

Manana karazana volobe na bambou miisa 46 isika eto Madagasikara ankehitriny.

Mbola tena vitsy io raha oharina amin’ireo karazany misy any ivelany, hoy i Vladimir Ratsimandresy, mpandrindra nasionalin’ny Prosperer omaly. Mahatratra 1.300 isa mantsy ny any ivelany, karazan-kazo iray hahafahana miady amin’ny fandripahana ala, indrindra fa ny eto amintsika. Vitan’ny volobe ny manolo ireo karazan-kazo hatao arina eto amintsika, ireo hatao fanaka sy haingon-trano maro isan-karazany. Ilana ezaka goavana ny fambolena volobe eto amintsika, hoy hatrany ity tompon’andraikitry ny Prosperer ity. Nahatratra 170 ha ny toerana efa voavoly volobe eto amintsika. Ankehitriny dia anisan’ny tanjona ny hampiakarana izany hatrany amin’ny 40.000 ha ho fiarovana ny tontolo iainana. Nankalazaina omaly ny andro maneran-tany ho an’ny volobe. Ankoatra ny fanentanana ny tsirairay mba hamboly sy hiaro ity karazan-kazo iray ity dia nisy ihany koa ny fampirantiana ireo karazana fanaka sy haingon-trano vita amin’ny volobe, hetsika notanterahina tetsy amin’ny hotel le louvre Antaninarenina. Tsiahivina moa fa azo hatao sakafo tsara ihany koa ny volobe na bambou misy eto amintsika.

Pati