Sosialy

Volamena ao Vohilava Mifampitana ny Depiote sy ny Lehiben'ny Distrika

Sosialy
Alarobia 02 Septambra 2020

Nikasa ny hanao fitokonana ny mponina ao Vohilava, omaly, tsy manaiky ny fitrandrahana volamena manimba tontolo iainana ao an-toerana ataona Sinoa. Nilaza ny depioten’i Mananjary

Mamihaja Charlot fa misy mandrahona hisambotra izay mponina mitokona. Nahitsy ny tenin’ity olomboafidy ity fa « fiarovana ny tombotsoan'ny Sinoa » no ataon’ny solontenam-panjakana ao Mananjary. Miangavy ny hanakatonana ny sambo mitrandraka volamena ao Vohilava io ny depiote Mamihaja Charlot. « Aoka tsy ny Vahoaka madinika efa nopotehinareo sy ny Sinoa ny tanindrazany no mbola hogadrainareo. Raha mety aminareo ny fitrandrahana volamena dia ataovy any am-baravaranareo no trongisiny, fa tsy ny Vahoaka sahirana, sady efa mijaly no foretinareo », hoy hatrany ity parlemantera ity, tamin’ny teny hentitra. Manahy mafy no mety fisiana kolikoly avo lenta ambadiky ny fitrandrahana volamena ataona Sinoa izay mampikaikaika ny Vahoaka ao Vohilava hatramin'ny ela ity solombam-bahoaka ity. Niantso ny ministera misahana ny harena ankibon’ny tany sy OMC Mananjary ny tenany mba hijery ifotony ny zava-misy sy ny fahoriana mianjady amin’ny vahoaka, ka hampiato io fitrandrahana io.

Jean D.