VOKATRA KABARO AO MENABE

Mitobaka, tsy misy mpividy

Sosialy
Alatsinainy 11 Novambra 2024

Mitobaka ny vokatra kabaro any amin’ny Faritra Menabe.

Ny ao amin’ny distrikan’i Manja no tena mitana ny laharana voalohany amin’izany saingy tsy misy mpividy, raha araka ny vaovao. Velaran-tany 3.300 Ha mantsy no voavolin’ny mponina tamin’ity taona ity nahazoana vokatra kabaro hatrany amin’ny 6.800 T. Mihitsoka tanteraka ny vola nampiasain’ireo tantsaha mpamokatra vokatr’izany. Tsy manana teknika afa-tsy ny fanamainana ny vokatra anefa izy ireo saingy mbola miandry amam-bolana maro ihany koa vao tonga amin’ny tanjona kendrena, arahin’ny haratsian-dalana mitondra azy mivoaka ny faritra. Noho ny toetr’andro tsara teo aloha moa no voalaza fa nahatsara ny vokatra kabaro tany amin’ny Faritra Menabe. Hetahetan’izy ireo araka izany ny hahatongavan’ireo mpandraharaha any an-toerana handray ny vokatra vokarin’izy ireo. Tafakatra 9.000 T moa no tontalin’ireo vokatra kabaro navoakan’ireo distrika rehetra tao Menabe tamin’ity taona 2024 ity raha 7.000 T tamin’ny taon-dasa.
Pati
Legende : Jerem-potsiny tahaka izao ny vokatra kabaro any amin’ny Faritra Menabe !