Vidin-drano eny Ankadindravola

Ivato Mahalany an’hetsiny isam-bolana ny olona

Sosialy
Talata 19 Septambra 2023

Efa volana maro indray izao no tapaka tanteraka ny famatsian’ny JIRAMA rano fisotro madio ireo mponina ao amin’ny Fokontany Ankadindravola, kaominina Ivato.

Hifampitadiavana mafy izany izay efa mahatratra 1.000 Ar ka hatramin’ny 1.500 Ar ny iray bidon miloko mavo. Tena mahatsiaro mijaly araka izany ireo mponina any an-toerana. Efa mahatratra 2 hetsy Ar isam-bolana mantsy ho an’ny sasany ny vidin-drano iray volana, ahitana olona 5 mianaka eo ho eo izay lafo noho ny hofantrano indray.Ny rano anefa no fototry ny aina. Ankoatra izay dia fantatra fa mampikolay fatratra ireo mponina eny an-toerana ihany koa ny fiakaran’ny vidim-piainana isan’andro. Lohalaharana amin’izany ireo kojakoja ilaina amin’ny fiainana andavanandro izay mila tsy ho araka intsony. Efa misy 1.000 Ar ohatra ny iray kapoaka amin’ny fotsim-bary, 700 Ar ny labozia lehibe iray, 500 Ar vao mahazo harina fandrehitra iray famarana…., fiakaran’ny vidim-piainana izay iraisan’ny tokantrano Malagasy rehetra amin’ny ankapobeny. Efa ho 3 taona mahery moa izao no efa tsy zarizary ny famatsiana rano avy amin’ny orinasa JIRAMA tao amin’ity Fokontany iray ity koa hanaovan’ny mponina antso avo amin’ny tompon’andraikitra. Nangonin’i Pati
Legende : Ankoatra ny jiro dia olana ihany koa ny famatsian-dranon’ny JIRAMA eto Antananarivo !