Sosialy

Vadina mpilalao kitra iraisam-pirenena Manao asa soa ao Brickaville isan-taona

Sosialy
Alatsinainy 09 Jolay 2018

Tsy manadino ireo Malagasy mila ny fanampiany isaky ny mandalo an-tanindrazana i Marinaah Doumbia, teratany Malagasy avy ao Andovoranto Brickaville vadina mpilalao baolina kitra iraisam-pirenena Ivoarianina milalao eo anivon’ny “Sporting Club de Portugal”.

Ny zoma lasa teo dia nisy ny asa sosialy natao ho fanampiana ny ivontoerana “Réfuge d’Aina” ao Analamalotra Toamasina II, izay toerana hitaizana sy hanabeazana ary hampianarana ireo “zanaky ny lalana” mpangataka sy mpitangorona teny amoron-dranomasina sy araben’ny fahaleovantena ao Toamasina renivohitra. Nanomboka ny taona 2015 no efa nanampiany isan-kerinandro ireo “zanaky ny lalana” ao Toamasina ireo, ka nanapa-kevitra izy sy ny mpiara-miasa aminy nanangana ity ivontoerana ity ny taona 2016. Manana sekoly garabola hatramin’ny taona faha-5 na “CM2” ny ivontoerana. Miisa 52 ireo zaza sy ankizy ary tanora beazina ao amin’ny “Réfuge d’Aina” amin’izao, ka ireo filana ilain’ny ivontoerana no natolotr’i Marinaah Doumbia ho azy ireo, anisan’izany ny vary, siramamy, boky, kilalao, kahie, kitapo, menaka, baolina, ary savony.

Rakoutou