Sosialy

Tsenan’ny henan’omby Tsy mahalany 30 kg isan’andro intsony ny mpivarotra iray

Sosialy
Sabotsy 24 Martsa 2018

Tena miaina ao anatin’ny fahasahiranana tanteraka ny ankamaroan’ny tokantrano malagasy ankehitriny.

Tsy mahalany henan’omby 30 kg isan’andro intsony mantsy ny mpivarotra iray amin’izao noho ny ankamaroan’ireo olona mividy antsasaky ny fahefany sy fahefany. 25 kg isan’andro ihany no lafon’izy ireo raha betsaka indrindra amin’ny andavanandro, raha ny fanadihadiana natao tamina mpivaro-kena iray etsy Anosibe. Roa andro ihany anefa raha be indrindra no azo tehirizina ny ambin’ny hena tsy lafo dia tsy maintsy hitadiavana hevitra mba tsy hahafaty antoka. Anisan’ireny ny fandefasana azy mora amin’ireo mpanao hôtely ka 8.000 Ar no hamarotany ny iray kilao. Mety ho tafidina hatrany amin’ny 6.000 Ar mihitsy aza izany rehefa tena mivangongo be. Tsiahivina fa maro amin’ireo mpivarotra hani-masaka amoron-dalana eto amintsika amin’izao no mivarotra vary 1.000 Ar ny iray lovia nefa mitafotafo mihoatra ny vary ihany koa ny laoka. Henan’omby ny ankamaroan’izy ireny sady efa vita saosy tsara. Raha ny fanadihadiana natao tamina dokotera mpitsabo iray anefa dia mety hiteraka aretina maro ny fihinanana ireny hena efa mialon’andro ireny. Anisan’ireny ny aretin-kibo raha mety hisy olana ihany koa ny vavony.

Pati