Sosialy

Traboinan’Ampamarinana Niala teny amin’ny « Village Voara »

Sosialy
Alarobia 13 Febroary 2019

Tantara mitohy ny olana mahazo ireo traboina vokatry ny vato nianjera teny Ampamarinana.

Taorian’ny namindrana ireo tokantrano sasany teny amin’ny tanàna Voara Andohatapenaka ny herinandro lasa teo mantsy dia efa saika niverina namonjy ny trano fonenany eny Ampamarinana daholo indray izy ireo. Tsy araka ny nifanarahana mantsy, hoy ny solontenan’ny mponina ny zava-nitranga. Raha apetraka amin’ny box no noeritreretin’ireo mponina dia trano jiafotsy no novantanin’izy ireo sady tsy misy jiro. Tsy misy fiarovana ho an’ny ainay mihitsy izany, hoy ireo mponina ka aleonay ihany mody. Ankoatra izay dia nambaran’izy ireo ihany koa fa tsy misy fijerena mihitsy ny asa fiveloman’izy ireo eto an-drenivohitra izay tsy maintsy ilàna saran-dalana 2.000 Ar isan’andro isan’olona raha kely mamonjy an’i Mahamasina. Ho an’ireo fianakaviana rava trano vokatry ny fianjeran’ny vatobe avy nandevina tany Betafo indray dia tsy manana trano hitoerana izy ireo hatramin’ny omaly sady tsy manan-kianteherana intsony ihany koa. Tapitra rava avokoa mantsy ny tranon’ireo fianakaviany teny Ampamarinana. Miandry vahaolana maharitra avy amin’ny fitondram-panjakana izy ireo ka anisan’ireny ny fanomezana trano ao anatin’ny fifanarahana mazava tsy misy olana.

Pati