Sosialy

Traboina noho ny fihotsahan’ny tany Tsy mamela ho irery azy ireo ny Ben’ny tanàna

Sosialy
Alarobia 23 Janoary 2019

Hatramin’ny omaly, dia razana 4 no mbola karohina tamin’ireo 18 nihotsahan’ny tany tesy amin’ny fokontany Tsarafaritra Tsimbazaza sy Tsimialonjafy ny sabotsy hariva teo,

nandritra ny ora-mikija tsy ankiato narahina varatra nampianjera hazo lehibe iray izay nahatonga ny loza. Miisa 86 kosa ireo olona tsy manan-kialofana sy voatery nafindra toerana, ka napetraka etsy amin’ny INFP Mahamasina . Tsy namela irery ireo traboina sy mana-manjo ny kaominina Antananarivo Renivohitra (CUA) notarihin’ny Ben’ny tanàna Lalao Ravalomanana, fa tonga nitsapa alahelo ny fianakaviana sady nitondra ny solon-drambon-dandy ho an’ny maty, nisy ihany koa fanampiana toy ny vary, menaka sy kojakoja an-dakozia natolotra ireo traboina. Nampanantena Ramatoa Ben’ny Tanàna, fa hisy ny fijerena akaiky ireto traboina ireto ara-tsosialy , nisy ihany koa toromarika nomena an’ireo tompon’andraikitra hakana haingana ireo ranon-tany. Mbola maro ireo toerana tandindonin-doza sy ahiana mbola hihotsaka, ary eo ireo mbola tsy nandao ny trano fonenany, ka anaovan’ny tompon’adraikitra eo anivon’ny Sampanana mpamonjy voinan’ny CUA etsy Tsaralalana Analakely fanentanana hatrany hialan’izy ireo amin’ireny trano tandindonin-doza ireny, hisorohana ny loza.

Toky R