Sosialy

Toamasina Tonga ny vary 15 000 taonina

Sosialy
Alarobia 25 Novambra 2020

Sambo iray mitondra vary 15 000 taonina nafaran’ny mpandraharaha no tonga tao Toamasina ny alatsinainy teo.

Io no nentin’ny sambo mahazatra, fa mbola maro be ihany koa ny amin’ny Kaontenera, raha ny tatitry ny Talem-paritry ny varotra ao Toamasina omaly. Noho izany, mampitandrina izahay ato anatin’ny Sampan-draharahan’ny Ministeran’ny varotra sy ny fanjifana ho an’ireo mpandraharaha mitady hanafina vary, ary tena handray an-tànana sy hanenjika. Misy rahateo amin’ireo mpandraharaha manely fa tsy misy ny vary. Nandritra ny fisavana tao Toamasina, dia nisy ireo mpandraharaha tsy nety namoaka ny faktiora, raha tsy efa niantsoana mpitandro filaminana. Tsy hoe ny vary izany no tsy misy, fa fanararaotana no betsaka, toy ny fanafenana ny tahiry ahafahana mampidangana ny vidiny. Na miakatra ihany koa aza ny vidim-bary, dia tsy misy fiantraikany amin’ny mpamboly satria tany amin’ny fotoana nahamora ny vokatra no nanangonana azy, ary iandrasana vanim-potoana maitso ahitra.

Toky R