Tetikasa PRODUIR

Andalam-pahavitana ireo trano etsy Andavamamba

Sosialy
Zoma 28 Febroary 2025

Mitana anjara toerana lehibe amin’ny fanajariana an’Antananarivo ny tetikasa PRODUIR (Projet de Développement Urbain Intégré et de Résilience)

vatsian’ny Banky Iraisam-pirenena. Miompana ny fanadiovana ny lakandrano C3 Anosibe hatrany Ambodimita, mikendry ny hanatsara ny fari-piainan’ny mponina eny amin’ny faritra iva amin’ny alalan’ny fametrahana fotodrafitrasa maharitra sy ny fanadiovana lakandrano ho fisorohana ny tondran-drano. Mirefy 12 km ny lakandrano C3 kasaina hodiovina, mba hanamora ny fikorianan’ny rano, indrindra amin’ny fotoam-pahavaratra. Hatramin’izao, efa vita 71% amin’ny asa, ka 115 000 m³ ny fotaka esorina sy haodina alohan’ny fandefasana azy any Iarinarivo, raha ny tatitra. Tsy maintsy nesorina ireo trano hazo nanamorona ny lakandrano, ka namoronana trano vaovao mahazaka fianankaviana 3 isaky ny iray, izay ireo nanaiky nesorina tsy nisy fanonerana no hisitraka izany, ka tsy misy vola alohany. Tokantrano miisa 84 no hipetraka amin’io toeram-ponenana vaovao io, izay ahitana trano 29 misy rihana 1 avy, ary hizara « appartements » 87. Tonga nijery izany ny mpitondra notarihin’ny Filoham-pirenena sy ny Solontena maharitry ny Banky Iraisam-pirenena eto Madagasikara Atoa Atou Seck omaly.
Toky R