Tetikasa

fampananan’asa sy sora-piankohonana

Sosialy
Alakamisy 20 Aogositra 2026

Notolorana mari-piofanana ny tao amin’ny boriboritany IV

Taorian’ny fanentanana sy fiofanana arak’asa toy ny fanamboarana savony sy mofomamy nisitrahan’ireo tanora 18 hatramin’ny 35 taona tao amin’ny boriboritany fahefatra dia niditra tamin’ny fanolorana mari-piofanana sy ny fitaovana enti-manana amin’izany ireo tanora maherin’ny 200 isa tao amin’ity boriboritany ity omaly. Notolorana sora-piankohonana ihany koa ny 102 tamin’izy ireo, hoy ny fampitàm-baovao voaray. Mbola tafiditra ao anatin’ny tetikasa soram-piankohonana sy fampananan’asa novolavolain’ny OIF na Sampan-draharaha iraisampirenena misahana ny firenena miteny amin’ny ampahany na manontolo ny teny frantsay niaraka tamin’ny fikambanana Andrimaso, izay mifototra amin’ny fanomezana sora-piankohonana sy fanofànana ary fampitaovana izy ity. Manomboka eto, dia misokatra ho an’ireo tanora ireo ny tontolo arak’asa satria afaka hiditra amin’ny sehatra ara-dalàna izy ireo, hoy ny Andrimaso. Efa manana kopia dia hirariana ny hananany kara-panondro ihany koa, hoy ihany ity fikambànana ity. Isan’ireo tonga nanontrona ny lanonana fanolorana ireo marika ireo omaly ireo manam-pehefana isan-tsokajiny nahitàna ny solontenan’ny Kaominin’Antanarivo Renivohitra, ny lehiben’ny distrika, ny delegen’ny boriboritany fahefatra, ny sefo fokontany. Samy nisaotra sy mbola manantena ny hitohizan’ny fiaraha-miasa amin’ny OIF sy ny fikambanana Andrimaso izy ireo. Nampanantena ny fanamorana amin’ny fanaovana kara-panondro ho an’ireto tanora nisitraka kopia ireto ihany koa ny delegen’ny boroboritany fahefatra, raha ny fampitàm-baovao hatrany.
Nangonin’i J. Mirija