Sosialy

Tanjombato « Court circuit » no nahamay kila ilay trano

Sosialy
Alatsinainy 02 Martsa 2020

Trano iray no nirehitra ny sabotsy teo tao amin’ny fokontany Ankady, kaominina Tanjombato, distrikan’Antananarivo Atsimondrano.

Vokatry ny “court circuit” no niteraka ny loza raha araka ny loharanom-baovao azo. Olona valo no tao amin’ity tokantrano ity izay marihina fa tsy nisy naratra na aina nafoy. Na izany aza levon’ny afo daholo kosa ireo karazana kojakojan-tokantrano maro samihafa izay tsy fantatra ny tentim-bidiny hatreto. Torak’izany koa ireo entana saika mbola hamidy. Tsy niitatra tamin’ny manodidina moa ny afo noho ny hafainganan’ny fahatongavan’ny sampana mpamonjy voina ao Tanjombato sy ny avy eo anivon’ny kaominina Antananarivo Renivohitra. Miantso ny rehetra mba samy ho mailo ny sampana mpamonjy voina ka hamono avy hatrany ny kaontera raha sanatria ka misy tranga hafahafa ao an-tokantrano. Toraka izany koa ny fametrapetrahana zavatra toy ny briquet na afokasoka mora takatry ny ankizy ao an-trano hisorohana ny loza mety hitranga.

Pati