Sosialy

Taksibe mihazo ny RN 1 Hampiakatra saran-dalana avokoa amin’ny volana martsa

Sosialy
Alarobia 27 Febroary 2019

Hampiakatra ny saran-dalany avokoa ireo taksibe ao anatin’ny zotra Kofiamo trans mampiasa ny lalam-pirenena voalohany mivondrona ao anatin’ny fivondronan’ny mpitatitra ivelan’Antananarivo Renivohitra na ny UCTS manomboka ny 10 martsa ho avy izao.

Noho ny fiakaran’ny vidin-tsolika sy ireo karazana kojakoja hampiasaina amin’ny fiara, ny haratsian-dalana, ny fitohanana lavareny no nambaran’ny filohan’ny UCTS Rakotoarimanana Fidimalala fa antony nandraisaisan’izy ireo ny fanapahan-kevitra. Ho an’ireo mihazo an’Imerintsiatosika dia hiakatra ho 1.200 Ar ho an’ny fiara sprinter, 1.400 Ar ho an’ny mazda kely raha 1.000 Ar avokoa izany teo aloha. Hiakatra ho 800 Ar kosa ny an’i Vontovorona, 700 Ar Alakamisy Fenoarivo ary 500 Ar ny eny Ampitatafika samy miainga avy eny Anosy. Samy efa nampahafantarina ireo ben’ny tanàna lalovan’izy ireo ny fiakarana saran-dalana. Ny hany hangatahin’ireto farany dia ny tokony hanatsarana hatrany ny tolotra omena ny mpanjifa hisorohana ny olana mety hitranga. Betsaka amin’ireo taksibe mantsy no faly mampiakatra saran-dalana fotsiny nefa na ny seza afovoany hipetrahan’ny mpandeha aza toy ny kitay kely fandrehitra.

Pati