Sosialy

STOI, MINAE, Yuan’s international Hamatsy vary safiotra ireo traboinan’ny rivodoza

Sosialy
Zoma 10 Febroary 2023

Natolotra tamin’ny fomba ofisialy omaly hariva tetsy amin’ny minisiteran’ny fambolena sy fiompiana etsy Anosy ny vary safiotra 5 taonina sy zezika biolojika na zezika taroka 5 taonina

ihany koa hamonjena ireo traboina vokatry ny fandalovan’ny rivodoza Cheneso farany teo teto Madagasikara. Fiaraha-miasan’ny orinasa tsy miankina STOI sy ity minisitera ity na MINAE ary ny orinasa sinoa namokatra voalohany ity karazam-bary ity, Yuan’s international, izay miasa eto Madagasikara izy ity, hoy ny fanazavana. Tanjona ny hahafeno hanampamokarana na fitaovana enti-mamboly ho an’ireo tantsaha mba hahafahan’izy ireo mihoitra taorian’ny fahavoazana, hoy ny minisitra Harifidy Ramilison. Iaraha-mahalala, hoy ny tomponandraikitry ny serasera eo anivon’ny orinasa STOI, Tahiana Razanamahefa, fa manodidina ny 3t/ha isan-taona no vokatra azo hatreto amin’ny karazam-bary mahazatra antsika, raha toa ka 12t fara-fahambaniny ary mety hahatratra 15t/ha mihitsy ho an’ny karazam-bary safiotra. 5 taona moa no fifanarahan’ny minisitera sy ny sehatra tsy miankina hanapariahana ny voly vary safiotra manerana an’I Madagasikara mba hahatrarana ny tanjon’ny filoham-pirenena ao anatin’ny velirano faha 9 dia ny fahavitan-tena ara-tsakafo, hoy hatrany ny fampahatsiahivana natao omaly.
J. Mirija