Sosialy

Soarano Maimbo tsy azo hampiasaina ny ranon’ny JIRAMA

Sosialy
Alatsinainy 11 Martsa 2019

Maimbo tsy azo hampiasaina ny rano vatsian’ny JIRAMA eny Soarano (Antananarivo I) amin’izao fotoana izao.

Raha araka ny fitarainan’ireo mponina dia efa ho iray volana izao no niainana izany hany ka betsaka ireo voatery nampiato ny asa fivelomany. Anisan’ireny ny mpanao volo izay tsy maintsy mampiasa rano mba hanasana ny lohan’ireo mpanjifa. Tsy nionona fotsiny tamin’izao ny mponina araka izany fa nampiantso ireo tompon’andraikitra teo anivon’ny JIRAMA. Nitondra santionany tamin’ny tavoahangy tamin’izany ireto farany raha ny vaovao farany mba hanaovany fitsirihana saingy tsy nisy valiny hatramin’izao. Miantso ny fandraisana andraikitra haingana hataon’ny JIRAMA araka izany ireo mponina eny Soarano. Efa namaly ny mahakasika ity rano maimbo eny Soarano ity ihany moa ny JIRAMA izay fantatra mitovy tranga amin’ilay rano maloto mandeha eny amin’ny paompy ihany koa. Saika vokatr’ireo fantsona efa antitra sy mihakely avokoa no antony mahatonga izany, fitaovana efa tsy nisolo am-polo taonany maro. Tsiahivina moa ho an’ireo mponina eny Soarano fa voatery mamorom-bola hividianana rano efa voavoatra amin’ny tavoahangy manokana izy ireo mba handrahoana sakafo; izany hoe mietombo ny fandaniam-bola isan’andro.

Pati