Sosialy

Sampandraharahan’ny fananantany Tsy handefitra amin’ny resaka kolikoly intsony

Sosialy
Alakamisy 18 Oktobra 2018

Anisan’ny ivontoerana iray voafaritra ho be kolikoly indrindra ny eo anivon’ny sampandraharahan’ny fananantany na ny “domaine”.

Ny resaka boky rovitra sy ny fampiasam-bola amin’ny fikarakarana ny antontan-taratasy no nambaran’Atoa Rasolomampionona Hasimpirenena, Tale jeneralin’ny fananantany ho tena ahitana izany betsaka. Ho an’itsy voalohany dia misy hatrany ny taratasy mivoaka izay tsy fanta-piaviana kanefa ilay boky mihitsy no rovitra ka tsy hahafahan’ny sampandraharahan’ny fananantany mamoaka ilay antontan-taratasy ilaina. Ho an’ny fikarakarana antontan-taratasy indray dia misy hatrany ireo olona mampiasa vola mba hahavitany haingana ao anatin’ny fotoana fohy, hoy izy. Tsy handefitra amin’ireo karazana tranga ireo intsony manomboka izao ity tale jeneralin’ny fananantany ity. Nisy omaly ny sonia fifanekem-piaraha-miasa notanterahin’izy ireo niaraka tamin’ny Birao Mahaleotena Miady amin’ny Kolikoly ( BIANCO) sy ny Transparency International (TI-IM), hahafahana manatanteraka ny ainga. Ho an’ny birao malahaleotena iadiana amin’ny kolikoly manokana moa dia nomarihin’ny tale jeneraliny Atoa Andriamifidy Jean Louis fa fitarainana roa no efa voarain’izy ireo hatreto mikasika ny tany iray manana “titre” roa samy hafa.