Sosialy

Sampana mpamonjy voinan’ny CUA Manao fanentanana ara-pahadiovana

Sosialy
Talata 27 Aogositra 2019

Ao anatin’ny ezaka fankalazana ny faha-70 taona niorenany ny vondrona mpamonjy voinan’ny kaominina Antananarivo Renivohitra (CUA) amin’izao fotoana ka hetsika maro no notanterahina.

Ny sabotsy 24 aogositra 2019 dia natomboka maraina vao mangiran-dratsy izany, tamin’ny famohaza-mandry, na « caravane », izay nataon’ny fiara be mpamonjy voina nihodina ny tanàna, narahana hazakazaka mba hampahafantarana ny mponina, fa misy mpamonjy voina miaro sy mitsinjo izy ireo isan’andro isan’ora. Nanadio tamin’ny alalan’ny rano sy kifafa ny faritra Tsaralalàna sy Analakely ihany koa ireo mpamonjy voina ary nanome dabam-pako ho an’ireo fiara mpitatitra miditra eto an-drenivohitra. Izany no natao dia ny tsy anarinarian’ireo mpanjifa ny fakony etsy sy eroa intsony satria Antananarivo no renivohitr’i Madagasikara, ka tokony hatao fitaratra. Nofaranana tamin’ny fanabeazana ny mponina ny hetsika, mba hikajiany sy hitandroany mandrakariva ny fahadiovana, ka ho tanàna madio sy milamina ary maha te honina Anatananarivo Renivohitra, araka ny vinan-dRamatoa Ben’ny tanànan’Antananarivo Lalao Ravalomanana.

Toky R