Sosialy

Sampana mpamonjy voina Miatrika asa maro noho ny rotsak’orana

Sosialy
Talata 15 Janoary 2019

Maromaro sahady ireo tranga nosahanin’ny sampana mpamonjy voina etsy Tsaralalana tao anatin’ny dimy andro izao, fotoana nirotsahan’ny ranon’orana tsy an-kiato teto an-drenivohitra.

Lalana mihotsaka etsy Antsahabe ny iray miampy ilay hazo lehibe iray izay ahiana hianjera amin’ireo trano eny an-toerana. Efa nanomboka omaly ny fikapakana io hazo io, raha araka ny fanazavan’ny kaomanda Randrianarisoa. Ankoatra ireto farany dia trano miisa dimy ihany koa no lasibatra ka ny roa tamin’ireo dia ny teny Tsaralalana sy Ambohimanarina no tsy maintsy nitsofohan’ny sampana mpamonjy voina ny nandrava izany raha ny tompony kosa no niandraikitra ny fandrodanana ireo trano telo ambiny. Na izany aza tsy nisy ny naratra na ny aina nafoy. Ankoatra ireto tranga ireo moa dia tranga roa ihany koa no nahazoan’ny sampana mpamonjy voina fitarainana omaly maraina ka efa nanomboka tamin’ny fanadihadiana izany izy ireo. Nomarihin’ny kaomanda Randrianarisoa moa fa tsy manana fitaovana raitra be hanaovana asa famonjena izy ireo saingy tsy maintsy miezaka manao izay vitany kosa. Toraka izany koa ny arak’olona, izay nomarihiny manokana fa tena vitsy dia vitsy tokoa. Miantso hatrany ny rehetra mba hiantso ny laharana maitso 118 araka izany ny sampana mpamonjy voina mba hampandre azy ireo raha vantany vao misy tranga hafahafa.

Pati