Sosialy

« Salon du bien-être » eny Mahamasina Isarihana ireo te hahay hikolo vatana

Sosialy
Zoma 03 Mey 2019

Tanterahina nanomboka omaly etsy amin’ny lapan’ny kolontsaina sy ny fanatanjahantena etsy Mahamasina haharitra efatra andro ilay hetsika « Salon du bien-être et de developpement personnel » karakarain’ny A&M Group.

Hetsika ara-pahasalamana natao hampivoarana ny maha olona izy io raha tsiahivina ka saika hita ao anatin’ireo tranoheva 30 mandray anjara eny an-toerana avokoa ireo karazana fitsaboana mampiasa ireo akora natoraly mampiavaka antsika eto Madagasikara ankoatra ny torohevitra maro samihafa toy ny fampianarana ny olona handrafitra « lettre de motivation » sy CV hisarihana ny mpampiasa. Fa tsy latsa-danja amin’ireo ny resaka kolo vatana izay zary hataontsika Malagasy sasany ambanin-javatra ankehitriny nefa mampiseho ny maha izy azy ny tena ihany koa. Ireo tanora malagasy latsaky ny 40 taona, hatrany amin’ny 70 % no ezahina hahazo tombontsoa avy amin’izany arahin’ny fanabeazana maro samihafa, raha araka ny fanazavan-dRtoa Masy Anglade, tompon’andraikitry ny serasera eo anivon’ny A&M Group. Ankoatra izay moa dia hisy ihany koa ny fitiliana maimaimpoana ireo karazan’aretina mety mahazo ny reny sy ny zaza, ny diabeta… izay tena manahirana ny ankamaroan’ny olona ankehitriny tokoa. 3.000 Ar vidim-pidirana, tsy mandoa kosa ireo ankizy latsaky ny folo taona.

Pati