Sosialy

Sakafo maimaimpoana ho an’ny mpianatry ny EPP Faritra 4 no hisantarana azy

Sosialy
Alakamisy 31 Janoary 2019

Hahazo sakafo maimaimpoana avokoa ireo mpianatra eny anivon’ny sekoly ambaratonga fototra manomboka izao.

Faritra efatra izay hita fa marefo ara-tsakafo indrindra no hahazo tombony voalohany ety am-piandohana dia ny Faritra Androy, Atsimo Andrefana, Vatovavy Fitovinany ary Atsinanana. Hiara-kiasa akaiky amin’ny fanatanterahana izany ny minisiteran’ny fanabeazam-pirenena sy ny fanofanana ara-teknika, ny PAM ary ny masoivoho Koreana Tatsimo ka mpianatra 3.000 isa no hahazo tombony. Tanjon’izy ireo ny hampihena hatrany ny tahan’ireo ankizy mitsoaka an-daharana an-tsekoly vokatry ny tsy fahampian-tsakafo, indrindra ao anatin’izao vanim-potoanan’ny maitso ahitra izao. Hiova endrika ny sakafo omena ireo mpianatra sy ny fomba fiasan’ireo mpiara-miombon’antoka. Raha vary, voamaina… no nalefan’ireto farany teo aloha dia avadika ho vola indray ary alefa mivantana amin’ireo tompon’andraikitra isam-paritra mba hahafahan’ireo mpianatra mihinana sakafo feno hery sy be otrikaina. Nandritra ny fitsidihan’ny masoivohon’i Koreana tatsimo Atoa Lim Sang Woo ny minisitry ny fanabaeazam-pirenena sy ny fanofanana ara-teknika Ramatoa Volahaingo Marie Therese no nahafantarana izany omaly, notronin’ny solontenan’ny PAM. Mbola hiitatra any amin’ny faritra hafa ny hetsika.