Sosialy

Ranomasina avadika ho ranomamy Nahomby ny andrana tany Androy

Sosialy
Alatsinainy 23 Mey 2022

Ny faran’ny herinandro teo no nanatanterahana ny andrana momba ny fikarohana namoronana fitaovana famadihana ny ranomasina na « déssalinisation »

ho lasa ranomamy, izay natao tao amin’ny Kaominina Ambanivohitra Erada Faritra Androy. Ny injeniera Avotriniaina Ravelo no nitondra izao voka-pikarohana izao any Androy.Voalaza fa nahitana vokatra avy hatrany ny andrana. « Araka ny vokatra hita sy ny filazan'ireo Vahoaka nisotro ilay vokatra azo dia tena mitovy amin'ny rano fampiasa andavan'andro ilay rano azo. Gaga sy talanjona izy ireo noho izany”, hoy hatrany ny tatitra. Nomarihina fa andrana no natao, ary mbola fitaovana kely no nampiasana ka kely araka izay ihany koa ny vokatra azo. “Ny tsy fahampian-drano no fototry ny olana (kere sy haintany) aty amin'ny Faritra Androy. Vonjy tavanandro Tompoko io fizarana vola sy sakafo ho an'ny Vahoaka aty Androy io. Miandrandra vahaolana maharitra (rano) avy amin'ny Fitondram-panjakana ny Vahoaka aty Androy”, hoy ny antso avon’ny olom-pirenena. Ary heverina fa anisan’izany ity famadihana ny ranomasina ho rano fisotro ity.
Toky R