Sosialy

Rano fisotro madio Mbola betsaka ireo faritra tsy misitraka izany

Sosialy
Sabotsy 27 Oktobra 2018

Mbola mihoatra ny 60 % ireo olona tsy misitraka rano fisotro madio eto amintsika, indrindra fa ny any amin’ny faritra ambanivohitra. Raha mahazo izany aza izy ireo dia amin’ny alalan’ny vovo sy ny rano mandeha ihany izay ahiana hitera-doza ho an’ny fahasalamana tokoa, indrindra fa ny ankizy madinika.

Mba ho fanampiana azy ireny ary dia namatsy rano fisotro madio ireo mponina ao amin’ny fokontany Ambohimarina Itaosy, kaominina Ambavahaditokana ny Rotary Club Mahamasina sy ny orinasa Star. Paompin-drano fisotro madio manara-penitra no natsangana ka fianakaviana miisa 105, ahitana olona manodidina ny 400 isa no hahazo tombontsoa. Omaly zoma no notokanana tamim-pomba ofisialy ny fotodrafitrasa, natrehin’ny Ben’ny tanànan’Ambavahaditokana Atoa Ratinarivo Bruno. Nambaran’ity farany fa tena tombontsoa lehibe ho an’ireo mponina ao aminy tokoa ny fisian’ny fotodrafitrasa vaovao vao natsangana tahaka izao ho fitandroana ny fahasalaman’ny mponina. Mbola misy ihany mantsy hoy izy ireo fokontany tsy misitraka rano fisotro madio ao aminy na dia efa manao ezaka goavana aza ny kaominina. Tafiditra ao anatin’ilay fandaharan’asa fanatsarana ny sosialin’ny mponina hiandraiketan’ny Star izao hetsika izao.

Pati