Sosialy

Petra-bola “Tsinjo Lavitra” Maherin’ny 460 000 ireo mpampiasa azy

Sosialy
Talata 05 Febroary 2019

Somary taraiky i Madagasikara eo amin`ny sehatra ara-banky. Miroso amin`ny fandraharahana ara-bola (Inclusion financière) ny paositra Malagasy(PTT) ankehitriny ary hataony fanamby noho ny soso-kevitra avy amin`ny vondrona iraisam-pirenen`ny paositra (UPU).

Ho an`ny paositra Malagasy, ny fampandrosoana ny fampiasana ny petra-bola dia anisan`ireo tanjona ao anatin`ny firosoana amin`ny fandraharahana ara-bola. Manatsara sy manamafy ary manao izay hampivoarana ny asany eo amin’ny tolotra fitehirizana na fandefasana vola efa nananany hatramin’izay. Ohatra ny tolotra « Tsinjolavitra » mahasolo ny asan’ny banky any amin’ireny faritra tsy ahitana banky ireny. Na teo aza ny olana ara-toekarena nosedrain`ny firenena, miakatra hatrany ireo liana amin`ny fampiasana ireo tolotra fitehirizana. Ny taona 2004 no niforona ny tolotra “Tsinjo Lavitra” izay napetraka ny hanampy ny olona amin'ny fitarihizam-bola, indrindra ho an’ireo any ambanivohitra manoloana ny tsy fandriampahalemana. Feno 15 taona ny “Tsinjo Lavitra” ary maherin`ny 460 000 ireo mpampiasa ity petra-bola ity manerana ny Nosy ary masoivohon’ny paositra miisa 254 eto Madagasikara no ahitana ny Tsinjo Lavitra, hahafahana maka sy mametraka vola. Nandritra ny lahateniny, nilaza ny tale jeneralin`ny PTT, Ranarison Richard fa ho fanamby apetraka ao anatin’ny dimy taona manaraka ny hahatonga ny isan’ny mpanjifa ho iray (1) tapitrisa. Manana ny tolotra fandefasam-bola faran’izay haingana mankany am-pitan-dranomasina ihany koa ny “Tsinjo Lavitra”, ary anisan’ireo tahirim-bola manana fandrakofana matanjaka indrindra eto amintsika. Ho an`ny “Tsinjo Lavitra”, ny tahan`ny petra-bola isan-taona dia 4%. Tolotra ho an`ireo mpanjifa izay misintona vola matetika (de type dépôt à vue). 6% ho an`ny tolotra « Tsinjo Avotra » izay natokana ho an`ireo izay tsy misintona vola mandritra ny enim-bolana hatramin`ny herintaona. 6,5% kosa ho an`ny “Tsinjo Fahanterana”, izay mametraka petra-bola natokana ho an`ny fisotron-dronono. Nosokafana omaly tamin`ny fomba ofisialy omaly alatsinainy 4 febroary teny amin’ny Paositra Analakely ny fankalazana ny faha-15 taona nisian’ny petra-bola Tsinjo Lavitra eo anivon’ny Paositra Malagasy. Mbola hitohy hatramin’ny anio tontolo andro, ny fanentanana sy fanokafana kaonty Tsinjo Lavitra ho an’ireo mandalo eny amin’ny Paositra Analakely.

Marigny A.