Sosialy

Orinasa Kraoma S.A Mitokona sy mitaky ny fialan’ny Rosianina eto

Sosialy
Alarobia 05 Desambra 2018

Nanatanteraka fitokonana nanoloana ny orinasan’izy ireo tetsy Ampefiloha nanomboka omaly ireo mpiara-miasa eo anivon’ny orinasam-panjakana Kraoma S.A.

Anton’ity fitokonana fanairana mandritry ny 3 andro ity moa, raha ny fanazavana, dia satria tomponandraikitra feno amin’ny fitadiavana ny mpanjifany hatramin’izay ity orinasa ity. Nanomboka ny faramparan’ny taona 2015 anefa, hoy izy ireo, dia niditra an-tsehatra ny fiadidiana ny repoblika ary nanome mpanjifa ny vokatr’izy ireo atao hoe Stork international. Ny 80%-n’ny vokatra amidy, hoy ny fanambarana, dia noterena omena ny stork na dia amin’ny vidiny ambanin’ny masonkarenan’ny orinasa aza no vidiny andraisana azy. Tsy nahagaga, hoy izy ireo, raha nitotongana ny lafiny ara-bola teo anivon’ny orinasa ary nisy mihitsy ny filazana fa sahirana ny orinasa. Vahaolana nomen’ny minisitra koa anefa, hoy ny fanambarana, ny fampidirana amboletra ny orinasa Rosianina Ferrum Mining na tsy nisy tolotra akory aza. Voalaza fa nisy fifanarahana 2 nosoniavina izay tsy fantatra ny votoatiny, hoy izy ireo, fa amin’ny ankapobeny aloha dia lasan’ny Rosianina ny orinasa. Noho izany, hoy ny fanambarana, no nanatanterahan’ny mpiara-miasa eo anivon’ny Kraoma S.A manerana ny nosy fivoriambe mba hialan’ireo Rosianina any amin’ny toeram-pitrandrahana rehetra sy hanafoanana ny fifanarahana natao an-tsokosoko.

J. Mirija