Sosialy

Orinasa JIRAMA Miezaka manafoana ny delestazy, tsy misy ahiana ny rano vatsiany

Sosialy
Alarobia 30 Janoary 2019

Hiezaka hanome jiro sy rano araka ny tokony ho izy ho an’ireo mpanjifany ny orinasa JIRAMA.

Nivoitra izany nandritra ny fitsidihan’ny minisitry ny angovo sy ny harena ankibon’ny tany vaovao Atoa Vonjy Andriamanga tany Ambohimanambola ny alatsinainy hariva teo. Anisan’ny nohazavainy ny mikasika ny fahatapahan-jiro nitranga ny sabotsy lasa teo. Nambarany fa tsy delestazy iny nitranga iny fa vokatry ny olana ara-teknika niarovana ny tambajotra avy any Andekaleka sady tsy fahatapahan-jiro efa voalamina ihany koa. Nitondran’ny tompon’andraikitra hafa fanazavana ihany koa ny mikasika ny rano vatsian’ny JIRAMA izay nomarihiny manokana fa tsy misy ahiana. Misy mpanara-maso tsy an-kiato mantsy ny kalitaon’ny rano ao Ambohimanambola izay zaraina ho an’ny mponin’Antananarivo ary iarahan’ny JIRAMA miasa amin’ny “Institut Pasteur” ny fanaraha-maso izany. Mahatratra 230.000 m3 isan’andro izany ary ampy ho an’Antananarivo hatrany, hoy ny JIRAMA na amin’ny main-tany na amin’ny fotoam-pahavaratra. Miantso ireo olona manana olana amin’ny resaka rano ny JIRAMA hifandray amin’izy ireo mivantana amin’ny pejy facebook-ny hahafahana mamaha ny olana haingana.