Sosialy

Partagé sur :
• facebook

Nanolotra fanafody sy kojakoja fampiasa amin’ny fitsaboana (Seringues, cathéters, perfuseurs) tao Toamasina ny orinasa Ambatovy ny 21 janoary 2019 ho fandraisany anjara amin’ny ady atao amin’ny

valanaretika kitrotro izay misy any amin’iny faritra iny. Hahafahana mitsabo isan’andro marary miisa 60 naiditra hôpitaly noho ny kitrotro mahery vaika ireo fanomezana avy amin’Ambatovy ireo, raha ny fanazavana. Telo tapitrisa ariary no tentim-bidin’ny fanomezana ary mahasahana ny antsasaky ny fangatahana nataon’ny tomponandraikitry ny fahasalamana any an-toerana tamin’ny sehatra tsy miankina. Natokana indrindra izany ho an’ny sampandraharaha mitsabo ny zaza (pédiatrie) ao amin’ny Hopitaly Be Toamasina sy toeram-pitsaboana ifotony CSB ao Fanandrana, Vohitrambato sy ny Dépôt Analakininina ary tranom-pahasalamana ifotony roa ao Tanandava sy Amboakarivo, mba hanohanana azy ireo amin’ny fiatrehana ny valanaretina. Ankoatra izany dia hanampy ihany koa amin’ireo fanentanana amin’ny fampahafantarana ny soritraretin’ny kitrotro ny ao Ambatovy mba hahafahan’ny ray aman-dreny mitsabo ara-potoana ny zanany alohan’ny hihomboan’ny aretina ka voatery hidirana hôpitaly. Tafiditra amin’ny fandraisan’Ambatovy anjara amin’ny hetsika ataon’ny Vovonan’ny sehetra tsy miankina ho amin’ny asa soa ao Toamasina izao fanomezana izao. Marihina fa isan’ireo sehatra ataon’Ambatovy laharampahamehana ambony indrindra amin’ny fametrahana ny fandrosoana lovainjafy any amin’ireo faritra iasany ny Fahasalamana, ny Aroloza ary ny Fidiovana, hoy hatrany ny fanamarihana.

J. Mirija

Tia Tanindrazana

Samia mijoro ho an'i Gasikara.