Sosialy

Orana maivana Tondraka sahady i Besarety, Andravoahangy, Antsakaviro

Sosialy
Alarobia 28 Oktobra 2020

Mbola orana maivamaivana toy iny nitranga omaly iny dia efa naha tondraka sahady an’i Besarety sy Andravoahangy ka hatrany amin’iny Antsakaviro iny.

Mahagaga ihany hoe efa am-bolana maro ary nitambatra ho taona mihitsy no nanamboarana iny lalan’i Besarety sy ny manodidina iny ary raha ny fanazavan’ireo tekinisianina nitarika ny asa aza dia hoe tafiditra ao anatin’izay ny fanadiovana ireo tatatra sy fanalana ny tsentsin’ireo lakan-drano. Akory anefa ny hagagana omaly fa dia mbola tsy nilaozana ny lazan’i Besarety sy ny manodidina azy miaraka amin’ny ranobe hatreny am-poto-pe. Isan’ny mampametra-panontaniana hatrany koa manoloana ny tranga toy itony hoe aiza ho aiza izany amin’izao fotoana izao ilay lazaina fa biraom-pirenena misahana ny loza sy tandindon-doza na BNGRC? Mbola tsy nahita vahaolana maharitra hiatrehana sy ny loza mety hateraky ny fahavaratra ihany ve tao anatin’izay taona maro izay? Roa herinandro lasa teo izay no nampahafantaran’ity rafitra ity fa efa miomana hiatrika ny fahavaratra izy ireo ka ny isam-pokontany sy ny kaominina koa dia mila miomana fa tsy hisy fahagagana eto saingy iny sahady moa no nitranga.

J. Mirija