Sosialy

Oniversiten’Antananarivo Sakoroka tsy nifankahitana indray

Sosialy
Talata 16 Aprily 2019

Nafana indray ny sakororoka teny Ankatso omaly. Nifamaliana ny tora-bato sy ny baomba mandatsa-dranomaso hatrany amin’ny faritry ny anjerimanontolo. Ao anatin’ny fampikatsoana tanteraka ny fampianarana ny sendikan’ny mpampianatra mpikaroka mivondrona ao anatin’ny SECES Antananarivo.

Naneho ny tsy fahafaliany ny mpianatra, izay nisafidy ny hanampy tosika ireo mpampianatra mpikaroka mivondrona ao anatin’ny SECES Sampana Antananarivo. Toy ny mahazatra, dia nisafidy ny hetsika mahery vaika kokoa tamin’ny alalan’ny fidinana an-dalambe sy ny toratoraka, kanefa efa niatrana tsy lavitry ny fiantsonan’ny fiara zotra 199 ireo mpitandro ny filaminana. Nifamaliana ny tora-bato sy lakrimozenina nandravana ny hetsika sy nanaparitaka ireo mpianatra hatrany amin’ny faritry ny anjerimanontolo. Marihina fa efa namaly bontana ny SECES ny praiminisitra Ntsay Christian, izay tsy nandray azy ireo sy toa nanipy baolina tany amin’ny minisitry ny fampianarana ambony sy ny fikarohana ara-tsiansa. Efa iray volana mahery sy herinandro eo ho eo ny fitokonan’ny SECES, ary ny filoham-pirenena sy ny praiminisitra izay sokajiana manampahefana mahefa eto amin’ny tany sy ny firenena no nangatahin’ny SECES hifampidinika amin’izy ireo, saingy tratry ny henoy izany ry hazon-damosiko. Naman’ny mandrisika ny SECES ho an’ny taona fotsy izao. Toa naman’ny manipy teny ny fanjakana fa tsy afaka ny hamaly ny fitakian’ny SECES, hany ka antso an’efitra hatreto ny hetsika. Anisan’ny antom-pitakian’ny SECES ny tsy fahampian’nympampianatra sy mpikaroka, kanefa tsy misy fandraisana vaovao. Ireo am-perinasa nahavita be tamin'ny fanompoana tsy hasondrotra noho ny fikatsoan'ny ''reclassement'' sy ''avancement'' navoakan'ny minisiteran'ny toekarena sy vola ary ny tetibola. Ireo Zokiolona manana traikefa tsy avela hanohy satria nofoanana ny ''maintien en activité'',... Miditra amin’ny fampiasana hery ny mpitondra, ka taorian’ny teny Vontovorona vao tsy ela, dia raikitra indray izany ny fandravana fitakiana amin’ny alalan’ny fampiasan-kery.

Toky R