OLAN’NY RANO AO ALASORA

Mbola ny kaominina hatrany no manao ny asan’ny JIRAMA

Sosialy
Alakamisy 12 Jona 2025

Mbola ny kaominina hatrany no manao ny asan’ny JIRAMA amin’ny famahana

ny olan’ny rano ao Alasora, raha araka ny fanazavan’ny Ben’ny tanana Randriantsoa Jimmy, omaly. Hatreto mantsy hoy izy dia mbola mijanona ho resabe hatrany ny fampanantenana nataon’ny Ministera tompon’andraikitra ny amin’ny hanamboarana toho-drano ao Sud Ambohipo, akaikin’ny barazin’i Mandroseza hamatsy rano ny mponina manontolo, indrindra fa ireo ambony toerana. Ny kamiaon’ny kaominina hatrany araka izany no mamatsy rano ny mponina ao an-tampon-tananan’Alasora, Miadana, Ambohitromby ary Mahitsy izay efa tsy nisy paompin-dranon’ny JIRAMA nandeha intsony an-taonany maro. Miteraka fatiantoka goavana ho an’ny kaominina tantanany izany raha araka ny fanazavan-dRandriantsoa Jimmy hatrany satria tsy maintsy ampiana sy tohanana ny mponina.
Pati
Legende : Mahatsiaro reraka amin’ny famahana ny olan’ny rano ao amin’ny faritra iadidiany ny Ben’ny tanana Randriantsoa Jimmy !