Sosialy

Olan’ny Panier Garni Ampahafantaro mazava ny vokatry ny fanadihadiana, hoy ny PASEM

Sosialy
Zoma 10 Janoary 2020

Ny PASEM na ny fiaraha-mientan’ny fikambanana sy sendikan’ny fanabeazana eto Madagasikara izay ivondronan’ny fikambanana sy

sendika miisa 23 eo anivon’ny minisiteran’ny fanabeazam-pirenena sy ny fanofanana arak’asa dia nanao fanambarana fa misaotra ny fitondram-panjakana noho ny fitsimbinany ny mpiasam-panjakana tamin’ny fanomezana “Panier garni sy fampiakarana ny karama”. Tsy mankasitraka ny endrika fanavahana eo amin’ny samy mpiasan’ny minisitera tamin’ny fizarana izany anefa ary miandry ny vokatry ny fanadihadiana nataon’ny IGE na “Inspection Générale de l’Etat”. Angatahana, hoy ny PASEM, mba hampahalalana ny maro ny vokatry ny fanadihadiana ary mitaky fanasaziana ho an’ireo izay nahavita heloka . Misarika ny sain’ny fitondrana mba hanaja ny teny nifanomezana . Ohatra amin’izany ny mikasika ilay 50.000 Ariary manomboka ny volana janoary izay omena ny mpiasan’ny minisiteran’ny fanabeazam-pirenena sy ny fanofanana arak’asa rehetra tsy an-kanavaka, Ny fanomezan-danja ny traikefa sy fahaiza- manao eo amin’ny sehatry ny fanabeazana amin’ny fitantanan-draharaha rehetra eo anivon’ny minisitera. Eto am-pamaranana dia mbola mamerina hatrany ny firarian-tsoa ho antsika rehetra, ary hiandry am-pitoniana ny vokatry ny fanadihadiana, hoy hatrany ny fanambarana.

J. Mirija