Sosialy

Mpivarotra eo amin’ny Esplanade Analakely Nankasitraka ny vahaolana sy fandaminan’ny CUA

Sosialy
Sabotsy 29 Septambra 2018

Miroso tsikelikely amin’ny fandaminana ny mpivarotra amoron-dalana ny kaominina Antananarivo renivohitra (CUA), mba hanatsarana endrika ny renivohitra ho soa iombonan’ny Malagasy, araka ny teny filamatry ny ben’ny tanàna Lalao Ravalomanana.

Ankehitriny , niova endrika ny eo ampitan’ny Pavillon Analakely izay nanombohana ny asa fanamboarana, satria niara-nientana ireo mpivarotra rehetra nanaraka ny fandaminana nataon’ny CUA amin’ny fanamboarana tsena vita amin’ny trano vy, izay ny mpivarotra ihany no manamboatra azy. Ny kaominina kosa no mandamina sy manome ny toerana hivarotan’izy ireo . Naneho ny hafaliany ireo mpivarotra satria tsy hanelingelina sy hanao sakoroka araka ny fitenin’ny tanora amin’ny fivondronana intsony izy ireo, fa hitady vola am-pilaminana . “Marihina fa antsitrapo no nanaovanay ny fanamboarana ary tsy nisy vola naloa tamin’ny CUA na ariary aza araka ny feo miely, fa izahay ihany no manamboatra ireo toeram-pivarotana vy ireo. Tsapanay fa mahasoa anay ny nataon’ny kaominina Antananarivo Renivohitra tarihin’ny ben’ny Tanàna Lalao Ravalomanana, koa isaoranay manokana izy amin’izany satria mitsimbina anay”, hoy ireo mpivarotra. Arak’izany, afaka ny fahasahiran’ny mpivarotra amoron-dalana manamorona ny tsena vaovao eo amin’ny Espalanade ankehitriny.