Sosialy

Mpivarotra amoron-dalana Nalamina ny teny Antaninarenina sy Petite Vitesse

Sosialy
Alarobia 23 Janoary 2019

Anisan’ny tena miteraka ny fitohanan’ny fifamoivoizana sy mandoto tanàna ireo mpivarotra amoron-dalana. Misy fotoana mantsy izy ireny milatsaka anaty arabe mihitsy no mivarotra sady tsy manadio ny toerana nialany ihany koa rehefa hariva ny andro, antony mampisavovona ny fako eny amin’ny arabe.

Nanome toromarika ny amin’ny handaminana azy ireny manokana ny Ben’ny tanànan’Antananarivo Renivohitra Lalao Ravalomanana. Natomboka omaly ny asa fandaminana ka teny amin’ny faritra Petite Vitesse sy teny Antaninarenina no nisantaran’ireo ekipa teknika avy amin’ny Boriborintany Voalohany izany. Araka ny nambaran’Atoa Rakotonirina Maminiaina lehiben’ny ekipa teknika avy ao amin’ny Boriboritany Voalohany dia ezahana alamina sy entanina ireo mpivarotra mba hanaja ny fahadiovana mandra-pahita ny tena vahaolana maharitra ho azy ireo. Nisy ihany ireo tsy maintsy nesorina teny amin’ny toerana toy ny teny Antaninarenina. Araka ny voalazan’ity tompon’andraikitra ity hatrany dia efa misy ireo “piqueteur” izay mijanona eny an-toerana mba ho fitazonana ny filaminan’ny toerana. Mbola hitohy hatrany izany raha araka ny fantatra.

Pati