Sosialy

Mpivarotra amoron-dalana etsy Analakely Miantso fifampiresahana haingana

Sosialy
Alatsinainy 19 Oktobra 2020

Raikitra indray ny fangalam-piery teny Analakely sy manodidina. Rehefa tonga eny an-toerana ny polisy nasionaly sy ny polisy monisipaly dia vaky tady mandositra ireo mpivarotra.

Mifanenjika ny roa tonta mandrampaharivan` ny andro izany. Raha tsiahivina dia nanomboka ny sabotsy 10 oktobra teo no nanomboka ny fanesorana ireo mpivarotra amoron-dalana sy ireo mpanamboatra finday izay manamorona ny “avenue” etsy Analakely. Nanome toky ny kaominina Antananarivo Renivohitra (CUA) fa omena toerana izy ireo saingy hatreto aloha dia mbola manjavozavo izany fanapahan-kevitra izany ka raisin` izy ireo ho fanesorana azy ankolaka. Herinandro aty aoriana mantsy dia mbola tsy misy toerana voafaritra. Miantso ny famahana ny olana haingana ireo mpivarotra amoron-dalana nanaovana fanadihadiana. Raha ny fitarainana ataon` izy ireo mantsy dia izay entana lasan`ireo polisy nasionaly monisipaly dia tsy misy miverina intsony izay lasa fatiantoka. Ny hita aloha, tsy mahafaka ireo mpivarotra amoron-dalana ireo polisy sy ny mpiasan`ny kaominina.

Marigny A.