Sosialy

Mpilalaon’ny Barea tsy tonga Hita ihany ilay fahabangana

Sosialy
Talata 13 Oktobra 2020

Na dia azo lazaina ho azo hitarafana ny mety hoavin’ny ekipam-pirenena malagasin’ny baolina kitra aza ireo lalao fitsapana miisa 2 vita hatreto dia hita ihany ny fahabangan’ireo mpilalao tsy tonga niatrika ireo fampivondronana in-droa miantoana tany Luxembourg ny 9 oktobra teo sy omaly 12 oktobra tatsy Maraoka.

Saika nanamarina izany ny ankamaroan’ireo mpankafy ary azo lazaina ho lojika ihany satria saika toerana tsy misy mahasolo hatreto ny ankamaroany. Mpanafika sy mpandrindra lalao i Carolus Andrea na Carolus Andriamahitsinoro. Sady irakiraka mpiaro eo afovoan’ny kianja I Ibrahim Amada no mpanavotra baolina ihany koa na hoe “milieu défensif et Récupérateur”. Manampy azy ao amin’izay fifehezana ny toeran’ny “milieu défensif" izay moa i Rakapy, Abel Anicet. Aty amin’ny elatra havia sy havanan’ny kianja kosa no misy an’i Jerome Mombris sy Romain Metanire ary ity vodilaharana amin’ny elatra havanana voalaza farany teo ity no tena niharihary ny tsy fisiany tao afara tao omaly. Ankoatry ny fametrahan-drizareo amerikanina ny maha “The machine” azy noho ny angovo sy hazakazany mampitolagaga dia tsy nahitana tolo-davitra na “centrage” fanaony mihitsy koa ny lalao nifanandrinan’ny Barea tamin’ny Burkinabe omaly.

J. Mirija