Sosialy

Mpidoroka zava-mahadomelina 12 taona no zandriny indrindra

Sosialy
Zoma 03 Mey 2019

Karazan-javatra iray zary fialambolin’ny ankizy sy ny tanora eto amintsika mihitsy ankehitriny ny fandraisana sy fidorohana zava-mahadomelina.

12 taona no kely indrindra amin’ireny, hoy ny dokotera Andriamiarinarivo Miarintsoa, tompon’andraikitra voalohany eo anivon’ny “Centre du Cure Aro Aina” etsy Andravoahangy. Efatra isan’andro raha kely no entin-dray aman-dreniny na ny mpanabe azy manatona azy ireo mba hotsaboina sy ahafahana amin’izany. Amin’ny ankapobeny, manana olana ara-pahasalamana na lasa manao herisetra be ilay ankizy vao mahafantatra ny manodidina. Ankizy tsy dia tsara fifandraisana amin’ny ray aman-dreniny avokoa ireo ankizy ireo raha ny fanazavany hatrany, antony mampanaotao foana azy. Voatery mitady fitiavana sy zavatra mahafinaritra any ivelany ny ankizy ka anisan’ireny ny fidorohana zava-mahadomelina. Sarotra anefa ny mitsabo ireo ankizy voafatotr’izy io raha araka ny fanadihadiana natao. Roa volana raha kely no hikarakarana azy ireny miampy tohana ara-tsaina, misy mahatratra 12 volana ny an’ny sasany. Miantso ny ray aman-dreny rehetra mba hanatsara ny fifandraisany amin’ny zanany, araka izany, ity dokotera iray ity. Rehefa voafehy ny fidorohana dia hitsahatra ho azy ny herisetra.

Pati