Sosialy

Partagé sur :
• facebook

Tany maherin’ny 3 ha no lasan’ny orinasan-tserasera iray any Salazamay Atsimo ao Toamasina na dia efa nahazo rariny tamin’ny Fitsarana aza ireo mponina nanajary ny tany efa an-taonany maro, araka ny fitarainan’ny solontenan’izy ireo, niakatra aty Antananarivo.

Nambaran’ireo mponina fa notsinontsinoavina ny didim-pitsarana ary tsy nandray ny andraikitra tandrify azy ny sampandraharahan’ny fananan-tany sy ny fitsarana ao Toamasina mikasika ity raharaha ity. Nanjary « dossier classé » mihitsy aza izy io vao tonga tao amin’ny fitsarana. Manampy trotraka koa ny famarotan’ny « receveur »-n’ny Domaine io tany io, amin’ity orinasam-pifandraisan-davitra ity, hoy ny solontenan’ireo mponina. Ny sabotsy teo dia norahonana hosamborina sy hampidirina am-ponja ireo vahoaka malagasy tompon’ny tany, araka ny fitarainana hatrany. Araka ny sarintany dia ampahan-tany kely no an’ilay orinasan-tserasera, nefa aty aoriana, nofaritany avokoa ireo faritra onenan’ny mponina ao Salazamay Atsimo, izay mirefy 3 ha mahery, araka ny ambentin-tenin’ireo solontenan’ny mponina tonga eto an-drenivohitra. Efa natetika niakatra fitsarana mantsy ny fifanolanana momba ny tany teo amin’ireo mponina sy ny orinasan-tserasera iray ity, saingy nahazo rariny hatrany ireo vahoaka fa tsy noraharahian’ilay orinasan-tserasera io didim-pitsarana nivoaka io, araka ny fanampim-panazavana. Tompon’antoka tanteraka amin’ity ny eo anivon’ny fitsarana ao an-drenivohitr’i Betsimisaraka ao. « Voatondro ho miala andraikitra, kanefa tsy afa-miala momba ity raharaha fibodoana tanin’olona ao Salazamay Atsimo ity ny fitsarana ao Toamasina », hoy hatrany Jaobelina solontenan’ny mponina lasibatra. « Manao antso avo amin’ny tompon’andraikitra mahefa izahay, fa lasan’ny mpanambola avokoa ny tany raha mitohy izao », hoy ny fitarainan’izy ireo.

J. Mirija

Tia Tanindrazana

Samia mijoro ho an'i Gasikara.