Sosialy

Mpianatr’Ankatso Manome 72 ora ny mpitondra mba hamahana ny olan’izy ireo

Sosialy
Zoma 17 Janoary 2020

Manahy mafy ny amin’ny hoaviny ireo mpianatra eny amin’ny anjerimanontolo. Raha araka ny fanazavana nentin-dRasolonirina Odilon,

mpitondra tenin’ny mpianatra omaly mantsy dia efa volana maromaro izy ireo izao no tsy afaka nanohy ny fianarany intsony nefa dradrain’ny mpitondra hatrany fa ny tanora no antoky ny ho avy. Namory mpanao gazety namoaka ny hetahetany izy ireo omaly ka nilaza fa manome 72 ora ireo tompon’andraiki-panjakana isan-tsokajiny mba hieritreretana haingana hahafahana mamerina ny fampianarana amin’ny laoniny. Tafiditra ao anatin’izany ny minisitry ny fampianarana ambaratonga ambony sy ny fikarohana siantifika izay tsy hita intsony izay tena fanapahan-keviny hatreto. Nomarihin-dRasolonirina Odilon moa fa lainga ny fivoizana sy ny filazana fa hataon’ny SECES fitaovana izy ireo. Maharary ny Seces, hoy izy matoa tsy mety mampianatra ary tsy afaka hanery azy ireo mba hampianatra anay izahay noho izany ny fanjakana ihany no tena tompon’ny vahaolana. Nomarihin’ireto mpianatra ireto moa fa raha sanatria tsy mamaly azy ireo ny mpitondra ao anatin’izay 72 ora izay dia hamory ireo mpianatra eny Ankatso rehetra izy ireo amin’ny talata ho avy izao manomboka amin’ny 8 ora maraina handinika izay paikady hanohizana ny tolona.