Sosialy

Mpanakanto Remanindry Marary mafy ao amin’ny hopitaliben’i Toliara

Sosialy
Sabotsy 19 Janoary 2019

Mihombo hatrany ny aretina mahazo an’i Remanindry, mpanakanto Malagasy iray havanana amin’ny fitendrena lokanga sy marovany avy any amin’iny faritra atsimon’ny Nosy iny.

Tapatapaka anefa ny fitsaboan-tena ataony raha ny vaovao azo noho ny tsy fahampian’ny hoenti-manana koa hanaovany antso avo amin’ny rehetra hahafahany mitsabo tena. Ho an’ireo mpanakanto namany dia hanatanteraka fampisehoana goavana etsy amin’ny Is’art Ampasanimalo izy ireo anio sabotsy 19 janoary hariva manomboka amin’ny 7 ora. Entina hanampiana an’i Remanindry avokoa ny vola azo avy amin’izany ankoatra ireo vonona ny handefa vola amin’ny alalan’ny M vola 034 45 825 75. Tsiahivina fa vakoka velona mandehandeha ho an’ireo mpanakanto namany i Remanindry. Efa nisolotena an’i Madagasikara manerana izao tontolo izao mantsy izy sady manana traikefa sy fahaiza-manao maro amin’ny fiarovana sy fanandratana avo ireo karazana kolontsaina misy eto amintsika. Manantena ny fiaraha-mientan’ny rehetra hanampiana an-dRemanindry ny mpanakanto Malagasy rehetra.

Pati