Sosialy

Miparitaka eny an-tsena ny manga Tokony hohanina madio foana

Sosialy
Alatsinainy 01 Oktobra 2018

Manomboka miparitaka eny an-tsena tsikelikely ny vokatra manga efa ho tapa-bolana mahery izao.

Tsy tena masaka ny ankamaroan’izy ireny, antony mahatonga ireo mpivarotra sasany hamadika azy ho lasary, amin’ny vidiny 200 Ar isaky ny mihinana. Mbola betsaka amin’ny mpanjifa no tsy sahy mihinana azy ireny noho ny resaka mandeha fa mbola mankarary ny manga tsy latsak’orana. Raha araka ny fanazavan’ny dokotera Ratafika dia efa azo hanina tsara ny manga raha ireo karazana avy any Antsiranana izay efa miparitaka eny an-tsena ankehitriny. Ho an’ireo karazany avy any amin’ny faritra hafa kosa dia mety sy tsara kokoa raha miandry orana kely ny fihinanana azy ireny. Ny manga latsak’orana mantsy dia mampatoy azy ka tsy atahorana intsony ny aretin-kibo. Ny manga mbola manta kosa dia saro-devona hany ka mampanahy kely ho an’ireo manana olana eo amin’ny fandevonan-kanina. Ilay marikivibe amin’ny tsirony ihany koa eo an-danin’izay hoy hatrany dokotera Ratafika dia mety hanakorontana ny taova rehetra ao anaty. Ny loto avy amin’ny manga no tena mankarary kibo raha ilay atodi-moka mipetaka aminy kosa no ahiana mety hiteraka tazo ka ilaina diovina sy sasana tsara vao hanina.Tsiahivina fa 1.000 Ar ny iray kilao amin’ny manga amin’izao eny amin’ny tsenan’Anosibe raha 3.000 Ar kosa ireo entina mandehandeha.

Pati