Sosialy

Mausolé Mpanendaka tratra teo am-pisintomana pôketrana vehivavy

Sosialy
Zoma 07 Jona 2019

Lehilahy mpanendaka iray no voasambotry ny pôlisy teny Mausolé ny talata lasa teo tokony ho tamin’ny 05 ora maraina rehefa avy nanendaka vehivavy roa nikasa handray taxibe teny an-toerana.

Raha tsiahivina kely ny tantara dia nanaraka ireo vehivavy roa ireto ilay mpanendaka izay marihina fa miisa roa koa. Nony tonga teo amin’ny toby fiantsonan’ny taxibe anefa izy ireo dia nanatona ireo vehivavy roa akaiky ireo olon-dratsy ka nisintona ny pôketran’ny iray tamin’izy ireo. Rehefa azon’ireo mpanendaka roalahy izany dia lasa nandositra izy ireo ka finday iray sy lela-vola 80.000 Ar no azony tamin’izany niampy taratasy maromaro mahakasika ilay voaendaka. Mbola nanam-bintana anefa ireto farany satria nisy pôlisy nanao fanamiana sivily nanavotra tampoka izy ireo ka mpanendaka iray no tratra raha mbola hifampitadiavana kosa ilay namany iray.