Sosialy

Marovoay Gara Tontosa ny Tournoi KMMR Moramanga

Sosialy
Talata 30 Oktobra 2018

Vita ny alahady 28 oktobra teo, tao amin’ny kianja Marovoay Gara Kaominina Morarano Gara RN 44, ny famaranana lalao baolina kitra nokarakarain'ny TIM Marovoay Gara ka nampitondraina ny anarana « Tournoi KMMR Moramanga ».

Nibata ny fandresena tamin’izany ekipan’i La Poste nandavo ny ekipan’Ambanjo tamin’ny isa 1-0. Akanjo filalaovana « complet » no natao amboara tamin’ity hetsika naharitra 1 volana sy tapany ity ary notolorana lelavola ho fanalana hetaheta kosa ny ekipa resy teo amin’ny famaranana. Nisy lalao fanokafam-bavony nifanandrinan’ireo andriambavilanitra any an-toerana nialohan’ity lalao famaranana ity. Ary satria tafiditra ao anatin’ny fotoanan’ny fampielezankevitra ny hetsika dia nisy mazava loatra ny fanentanana fohy nataon’ny prezidan’ny Kmmr Moramanga, Charlot, niaraka tamin’i Me Lemeza ny amin’ny hiomanan’ny rehetra nanatrika ny lalao hiatrika ny fifidianana ho tontosaina amin’ny 7 novambra 2018 ka hampandaniana indray an’i Dada Marc Ravalomanana kandida n°25 hiverina hitondra ny firenena ao anatin’ny 5 taona manaraka.

Ntsoavina Evariste