Sosialy

Manjakaray Lasibatry ny afo ny trano vadim-piangonana

Sosialy
Zoma 06 Septambra 2019

Nitrangana hain-trano tao Manjakaray, omaly maraina tokony ho tamin’ny 08 ora sy 36 minitra. Lasibatra tamin’izany ny trano vadim-piangonan’ny fiangonana Advantista noho ny “court circuit”.

Lasa lavenona ny entana tao anatina efitrano miisa telo dia ny efitrano fandriana, ny lakozia ary ny fametrahana korontan’entana. Avotra kosa ny tao amin’ireo efitrano roa lehibe, raha araka ny fanadihadiana natao. Fotoana vitsy monja taorian’ny antso voarainy mantsy dia efa tonga teny an-toerana ny sampana mpamonjy voina ka 30 minitra dia voafehy ny afo. Tsy nisy ny naratra na ny aina nafoy. Raha araka ny fanazavan’Atoa Razafindrabe Parfait Mamy, kaomandan’ny kaompania eo anivon’ity sampandraharaha iray ity ihany koa dia ny 30 %-n’ny entana ihany no may fa avotra ireo antontan-taratasy sarobidy sy ny vola. Tsiahivina fa misy rihana ity trano ity saingy angara no ambany.

Pati